Takk fyrir drulluna!

Rúmlega 1.100 manns á öllum aldri tóku þátt í Drulluhlaupi Krónunnar í Mosfellsbæ á laugardag. Að Drulluhlaupinu standa Ungmennafélag Íslands, Krónan og Ungmennafélagið Aftureldingu (UMFA). Í Drulluhlaupinu fara þátttakendur 3,5 kílómetra langa leið sem er vörðuð fjölmörgum hindrunum, vöðum, vötnum og lækjum sem þarf að komast yfir, risastórum rörum sem þarf að troðast í gegnum og lágum netum sem þarf að skríða undir – í drullu. Hlaupið var haldið í fjórða sinn á laugardaginn og hefur Krónan stutt við verkefnið frá hugmynd að framkvæmd þess.

Við endamarkið fengu þátttakendur viðurkenningu og gátu fengið sér holla og góða næringu af Krónuhjólinu ásamt því að skola af sér og geta farið í sund. Leikkonan og lífskúnstnerinn Sandra Barilli ásamt plötusnúði héldu uppi stuði við rásmarkið allan tímann og tóku á móti þátttakendum sem komu í mark. Ekki var tímataka í hlaupinu enda áherslan öll á að fólk njóti viðburðarins.

„Lýðheilsa er eitt af mikilvægustu leiðarstefum Krónunnar og passar Drulluhlaupið því vel inn í þá sýn okkar. Það hvetur ekki aðeins til hreyfingar barna og ungmenna, heldur stuðlar það einnig að skemmtilegri samveru og samvinnu með fjölskyldu og vinum. Við erum strax farin að hlakka til Drulluhlaups Krónunnar 2026,“ segir Freyja Leópoldsdóttir, forstöðumaður markaðs- og sjálfbærnimála hjá Krónunni.

„Drulluhlaupið sannar enn og aftur að fólk leitar eftir fjölbreyttum leiðum til að stunda íþróttir eitt og með öðrum og á eigin forsendum. Hér er því ákalli svarað,“ segir Jóhann Steinar Ingimundarson, formaður UMFÍ.