© 2025 - Krónan
Kt. 711298 2239
Skrifstofa Krónunnar
Sími: 585 7000
Dalvegur 10-14
201 Kópavogur
kronan@kronan.is
18. desember 2025
Krónan og Sælkerabúðin sameina krafta sína
Vörur frá Sælkerabúðinni eru nú fáanlegar í Snjallverslun Krónunnar og völdum verslunum Krónunnar á höfuðborgarsvæðinu, auk verslana á Selfossi, Akranesi, Akureyri, Reyðarfirði og í Reykjanesbæ. Í boði verða forpakkaðar nauta- og lambasteikur, meðlæti, forréttir, súpur og tilbúnar sósur frá Sælkerabúðinni. Vörurnar koma í verslanir í dag, fimmtudag en verða fáanlegar í verslunum Krónunnar á Akureyri og Reyðarfirði á morgun, föstudag. Með samstarfinu fá viðskiptavinir þannig aðgengi að vörum sem hingað til hafa aðeins verið fáanlegar í Sælkerabúðinni á Bitruhálsi.
Landsbyggðin fær aukið aðgengi að sælkeravörum
Sælkerabúðin var opnuð um mitt ár 2020 af meistarakokkunum Hinriki Lárussyni og Viktori Erni Andréssyni, sem hafa hlotið fjölda verðlauna í matreiðslukeppnum sem hluti af íslenska kokkalandsliðinu. Þeir eru spenntir fyrir samstarfinu, sem gerir þeim kleift að ná til mun stærri hóps viðskiptavina en áður.
„Fyrir okkur snýst þetta fyrst og fremst um að deila því sem við elskum; góðum hráefnum, vönduðum uppskriftum og mat sem fólk getur notið saman. Með samstarfinu við Krónuna fáum við tækifæri til að færa þessa upplifun til mun fleiri heimila um allt land. Við leggjum mikla áherslu á bragð, gæði og upplifun í hverjum bita og hlökkum til að sjá viðtökurnar,“ segir Hinrik.
Gæðavörur á hárréttum tíma fyrir jól og áramót
Að sögn Guðrúnar Aðalsteinsdóttur, framkvæmdastjóra Krónunnar, fellur vöruframboð Sælkerabúðarinnar afar vel að stefnu Krónunnar um að bjóða upp á fjölbreytt vöruúrval og geta mætt þörfum viðskiptavina sem eru að leita að vönduðum sérvörum á hagstæðu verði sem auðvelt er að elda og framreiða. Ennfremur nefnir hún að Sælkerabúðin og Krónan deili sömu gildum þegar kemur að metnaði, þjónustulund og nánu samtali við viðskiptavini.
„Við viljum mæta fjölbreyttum þörfum viðskiptavina og gera gæði aðgengileg, hvar sem fólk býr. Það er því sérstaklega ánægjulegt að geta boðið þessar vörur víða um land og styrkja vöruframboð Krónunnar enn frekar, rétt fyrir hátíðarnar. Hér er úrval sem auðveldar fólki að gera vel við sig og sína án mikillar fyrirhafnar. Við hlökkum til að þróa samstarfið áfram með Hinriki og Viktori og erum sannfærð um að matgæðingar landsins taki vel í þetta nýja og spennandi vöruframboð,“ segir Guðrún.
