© 2025 - Krónan
Kt. 711298 2239
Skrifstofa Krónunnar
Sími: 585 7000
Dalvegur 10-14
201 Kópavogur
kronan@kronan.is
9. október 2025
Krónan styrkir söfnun UNICEF fyrir börn á Gaza
Krónan mun bjóða viðskiptavinum sínum að styðja neyðarsöfnun UNICEF á Íslandi þar sem allur ágóði mun renna til aðstoðar barna á Gaza. Söfnunin hefst í dag og stendur yfir til sunnudagsins 19. október. Á tímabilinu fá viðskiptavinir tækifæri til að bæta við 500 krónum eða meira í lok innkaupa í öllum verslunum Krónunnar og mun upphæðin sem safnast mun renna óskert til söfnunarinnar. Krónan mun þá jafna hvert framlag viðskiptavina, krónu á móti krónu.
Hörmungar barna í Gaza hafa staðið yfir í tvö ár þar sem takmarkanir á aðgengi mannúðaraðstoðar og skortur á mat, vatni og læknisaðstoð gerir það að verkum að heil þjóð sveltur. Bráðavannæring barna í Gaza-borg, þar sem hungursneyð hefur verið lýst yfir, eykst ört milli mánaða og telst fimmta hvert barn vannært. UNICEF er ein þeirra stofnana sem fá að fara með hjálpargögn inn á Gaza í krefjandi aðstæðum og mun söfnunarupphæðin renna til lífsbjargandi verkefna eins og næringaraðstoð og heilbrigðisþjónustu barna.
„Við hjá UNICEF á Íslandi erum þakklát að enn á ný sé Krónan að stíga upp til að standa með réttindum barna sem búa við neyð,“ segir Birna Þórarinsdóttir, framkvæmdastjóri UNICEF á Íslandi. „Við vitum að framtakið mun mælast vel fyrir hjá viðskiptavinum Krónunnar og vonum að þetta verði öllum hvatning að leggja sitt af mörkum, því þegar kemur að mannúðaraðstoð á Gaza skiptir hver mínúta máli. UNICEF er í þeirri stöðu að geta skipt sköpum í lífi barna sem búa við hörmulega neyð og til að mæta þörfinni þarf fjárhagslegan stuðning og því skiptir hver króna máli.“
Guðrún Aðalsteinsdóttir, framkvæmdastjóri Krónunnar segir að það sé Krónunni bæði ljúft og skylt að nýta lausnir sínar til að safna fyrir jafn þörfu málefni og þessu, og á sama tíma leggja sitt af mörkum til aðstoðar barna í neyð.
„Það er erfitt að setja sig í spor barna sem búa við hungur, ótta og óöryggi dag eftir dag og nú eru yfir 130 þúsund börn undir fimm ára aldri á Gaza alvarlega vannærð. Við í Krónunni viljum leggja okkar af mörkum með því að virkja samfélagið okkar til góðra verka. Með hjálp viðskiptavina okkar getum við staðið saman og látið hvert framlag vega tvöfalt – krónu á móti krónu,“ segir Guðrún.
Á mynd: Guðrún Aðalsteinsdóttir, framkvæmdastjóri Krónunnar og Birna Þórarinsdóttir, framkvæmdastjóri UNICEF á Íslandi
