© 2025 - Krónan
Kt. 711298 2239
Skrifstofa Krónunnar
Sími: 585 7000
Dalvegur 10-14
201 Kópavogur
kronan@kronan.is
3. júní 2025
Krónan í Vallakór opnar á ný eftir endurbætur
Verslun okkar í Vallakór í Kópavogi er opin! Verslunarrýmið hefur verið tekið í gegn með það fyrir augum að ferskleiki og fjölbreytt vöruúrval fái að njóta sín.
Opnar klukkan 8 fyrir morgunglaða
Verslun Krónunnar í Vallakór opnaði í september 2013 og hefur því þjónustað íbúa á svæðinu í hartnær 12 ár.
„Það var því kominn tími til að verslunin fengi yfirhalningu eins og við höfum gert í öðrum stærri verslunum Krónunnar. Með þessu mætum við betur fjölbreyttum þörfum viðskiptavina og bætum upplifun til muna,“ segir Unnur Thelma Gestsdóttir, verslunarstjóri Krónunnar í Vallakór og þakkar viðskiptavinum fyrir biðlundina á meðan framkvæmdir stóðu yfir.
„Við hlökkum mikið til að bjóða íbúa Vatnsenda og aðra viðskiptavini velkomna á ný. Við höfum einnig lengt opnunartíma verslunarinnar sem áður opnaði klukkan 9 á morgnana en opnar nú klukkan 8, morgunhönum eflaust til mikillar gleði,“ segir Unnur.
Umhverfisvænar lausnir og betra flæði í gegnum verslunina
Í versluninni hefur verið lögð rík áhersla á umhverfisvænar lausnir og betri orkunýtingu, þar með talið:
Orkusparandi LED lýsing.
Kælar og frystar eru lokaðir og knúnir með umhverfisvænu kerfi sem dregur úr losun gróðurhúsalofttegunda.
Grænar innkaupakerrur úr endurunnu plasti úr sjónum prýða verslunina, sem er hluti af framtaki okkar til að draga úr plastmengun og stuðla að sjálfbærari rekstri.
„Það er að mörgu að huga í yfirhalningu sem þessari en við höfum lagt upp úr því að bæta flæði og upplifun fyrir viðskiptavini,“ segir Guðrún Aðalsteinsdóttir, framkvæmdastjóri Krónunnar.
„Við leggjum sem endranær áherslu á ferskleika, fjölbreytt vöruúrval og hagstæð verð en þetta eru lykilatriði sem við viljum að viðskiptavinir upplifi strax við komu í verslunina. Það eru fjölmargir sem koma að svona verkefni og við erum gríðarlega spennt að heyra hvað okkar viðskiptavinum finnst um breytingarnar.“
Snjallari og þægilegri innkaup
Til að gera innkaupin enn þægilegri hefur ný lausn í Skannað og skundað verið innleidd í Vallakór. Nú geta viðskiptavinir leitað að vöru í appinu og séð á yfirlitskorti hvar hún er staðsett í versluninni, auk þess sem verðmerkingin byrjar að blikka þegar viðskiptavinir nálgast vöruna. Lausnin hefur áður verið tekin í notkun í verslunum Krónunnar á Granda, Grafarholti, Akrabraut, Lindum og Bíldshöfða við góðar undirtektir.
Glæsileg opnunartilboð
Í tilefni opnunar verða ýmis tilboð í boði alla opnunarhelgina 5.-9. júní, meðan birgðir endast. Þar á meðal verður 5% afsláttur á öllum vörum þegar notast er við Skannað og skundað.
