19. janúar 2024
Ánægðustu viðskiptavinirnir - sjöunda árið í röð!
Viðskiptavinir Krónunnar eru þeir ánægðustu á matvörumarkaði, samkvæmt niðurstöðum Íslensku ánægjuvogarinnar sem kynntar voru föstudaginn 19. janúar. Krónan hlaut hæstu einkunn meðal verslana á matvörumarkaði með marktækum mun, eða 73,7 stig af 100 mögulegum.
Guðrún Aðalsteinsdóttir, framkvæmdastjóri Krónunnar tók við viðurkenningunni fyrir hönd Krónunnar og tileinkaði árangurinn öllu starfsfólki Krónunnar sem vinnur statt og stöðugt að því að mæta þörfum viðskiptavina á degi hverjum og viðhalda því mikilvæga og góða samtali sem þarf til að skapa matvöruverslun framtíðarinnar.
„Enn og aftur hljótum við hjá Krónunni þessa dýrmætu viðurkenningu og staðfesta niðurstöðurnar þá þrotlausu vinnu sem unnin er innan verslana okkar á degi hverjum þar sem markmiðið er ávallt að veita framúrskarandi þjónustu og þróa snjallar lausnir fyrir Krónuvini okkar. Það er einnig ánægjulegt hljóta þennan heiður sjöunda árið í röð og má því með sanni segja að við séum í sjöunda himni með árangurinn,“ segir Guðrún.
Íslenska ánægjuvogin er í eigu Stjórnvísi og er framkvæmd af Prósent. Markmið verkefnisins er að láta fyrirtækjum í té mælingar á ánægju viðskiptavina en einnig öðrum þáttum sem hafa áhrif á hana, s.s. ímynd, mat á gæðum og tryggð viðskiptavina.
