Búum til kryddsmjörið með því að saxa kryddjurtirnar smátt og hnoða þeim saman við smjörið. Best er að hafa smjörið við stofuhita.

Smjörinu er svo troðið undir skinnið á bringunni. Það er gott að losa það frá varlega og smyrja smá í einu undir skinnið. Ef smjörið festist illa er gott að þerra aðeins fyrst.

Útbúum næst kryddblönduna, hrærum saman öllum kryddunum og stráum þétt yfir kjötið. Nuddum kryddinu aðeins í yfirborðið.

Setjum gróft skornar gulrætur, lauk og sellerí í botninn á ofnplötu eða steikarfati. Grind yfir og kalkúninn á grindina. Því næst setjum við kalkúninn inn í ofninn á 155°. Við eldum bringuna eftir hita en ekki tíma og er því nauðsynlegt að vera með kjöthitamæli við hendina. Kalkúnninn er fullkominn við 69°c. Það má áætla að þetta muni taka um 1,5 - 2 klst eftir þyngd kjötsins.

Strax og kalkúnninn fer inn í ofninn er gott að útbúa glaze-ið. Hrærum öllu saman í potti og hitum upp þar til hunangið leysist upp og smjörið er bráðnað. Svo á svona hálftíma fresti penslum við þessu yfir kjötið.

Þegar kjötið hefur náð 69° tökum við það út um leið og setjum yfir það álpappír og hvílum meðan við útbúum sósuna.

Sósan er afar einföld. Við hellum úr ofnplötunni allri fitunni og vökvanum af kalkúninum í pott og blöndum hveiti hægt út í þar til þetta þykist aðeins.

Svo hellum við rólega kjúklingasoði út í á meðan við hrærum.