Krónan bregst við samkomubanni stjórnvalda


Í kjölfar samkomubanns heilbrigðisráðherra hefur Krónan virkjað ferla sína sem styðja við tilmæli yfirvalda. Á hefðbundnum degi eru sjaldan fleiri en 100 samankomnir í verslunum Krónunnar og í raun fer fjöldinn aðeins yfir 100 í stærri verslunum Krónunnar á álagstímum sem eru á milli kl. 16 – 19. Því beinir Krónan því til viðskiptavina sinna að sé þess kostur sé gott að koma utan álagstíma í verslun.

Þá áréttar Krónan að enginn vöruskortur sé fyrirsjáanlegur. Þannig eru 60 – 70% af vöruframboði Krónunnar íslensk framleiðsla og engin stöðvun er á framleiðslu. Þá hefur Krónunni ekki borist nein flöggun frá erlendum birgjum vegna stöðvunar framleiðslu. Vegna álags á verslunum síðastliðna daga hafa starfsmenn þó ekki náð að fylla á hillur nægjanlega hratt en sendingar berast í hverja búð daglega og fyllt er á fyrir opnun.

Fylgst verður með fjölda viðskiptavina inni í verslun hverju sinni til að tryggja að farið sé eftir öllum ráðleggingum sóttvarnalæknis, landlæknis og almannavarna. Frá og með mánudeginum munu starfsmenn sinna talningu inn og út úr verslunum komi til þess.

„Við bregðumst að sjálfsögðu við og fylgjum öllum tilmælum. Mikilvægt er að undirstrika að nóg er til af vörum, vöruhús Krónunnar er fullt af vörum og því mun ekki verða neinn vöruskortur hjá okkur. Það er því engin þörf á því að hamstra vörur. Eðlilegt er að fólk sé áhyggjufullt því þetta eru fordæmalausir tímar, en við erum vel undirbúin og enginn þarf að óttast vöruskort hjá okkur. Við höfum undirbúið okkur vel undanfarnar vikur og fylgjumst jafnframt vel með. Við munum hafa að leiðarljósi að gæta þess að þetta hafi sem minnst áhrif á viðskiptavini okkar“, Segir Hjördís Elsa Ásgeirsdóttir, markaðsstjóri Krónunnar

Frekari upplýsingar veitir Hjördís Elsa Ásgeirsdóttir, markaðsstjóri Krónunnar.

Meðfylgjandi mynd er úr verslun Krónunnar. Frekara myndefni frá verslunum Krónunnar.

Birt: 13. mars, 2020